امریکی ڈالر128روپے سے تجاوز کرگیا، یوریا کھاد اور سیمنٹ کی قیمتوں میں اضافہ

کراچی : کاروباری ہفتے کے دوسرے روز بھی ڈالر کی قدر میں اضافہ دیکھنے میں آیا، انٹر بینک مارکیٹ میں ڈالر نئی بلند ترین سطح پر128.30بند ہوا، یوریا کھاد اور سیمنٹ مہنگا کردیا گیا۔

تفصیلات کے مطابق انٹربینک اور اوپن مارکیٹ میں روپے کی قدر میں مزید کمی آئی ہے اور ڈالر تاریخ کی بلند ترین سطح128 روپے30 پیسے تک پہنچ گیا، آج انٹر بینک مارکیٹ میں ڈالر128.30روپے پر بند ہوا۔

امریکی ڈالر کے مقابلے میں روپے کی قدر میں آ ج30پیسے کمی آئی، جبکہ طلب کے مقابلے میں رسد میں کمی بھی دیکھی گئی، اس حوالے سے ڈیلرز کاکہنا ہے کہ اوپن مارکیٹ میں ڈالر129روپے سے اوپر فروخت ہورہا ہے، گذشتہ روز ایک دن میں ڈالر6.45روپے مہنگا ہوا تھا، گزشتہ دو روز میں روپے کی قدر میں پونے سات روپے کی کمی آچکی ہے۔

دوسری جانب روپے کی قدر میں کمی کے اثرات آنا شروع ہوگئے ہیں، یوریا کھاد اور سیمنٹ مہنگا کردیا گیا، انڈسٹری ذرائع کے مطابق یوریا کھاد کے فی بیگ کی قیمت میں50روپے کا اضافہ کیا گیا ہے، اس اضافہ کے بعد یوریا کھاد کے بیگ کی قیمت 1582روپے ہوگئی۔

یوریا کھاد کی قیمت ملک کی دو بڑی نجی کمپنیو ں نے بڑھائی ہے جبکہ ڈی اے پی کھاد کی قیمت میں اضافہ نہیں کیا گیا، انڈسٹری ذرائع کا کہنا ہے کہ آج سیمنٹ کے تھیلے کی قیمت میں بھی دس روپے کا اضافہ ہوا۔

گزشتہ تین ہفتوں میں سیمنٹ کا ایک بیگ 45سے55روپے مہنگا کیا جاچکا ہے، کوئلہ اور ڈالر مہنگا ہونے کے باعث سیمنٹ مہنگا ہوا، نارتھ ریجن میں سیمنٹ کے بیگ کی قیمت575اور ساؤتھ ریجن میں630روپے ہوگئی۔

Leave a Reply

Your email address will not be published. Required fields are marked *

گذشتہ شمارے